XXXVI.
Seigneiras e cavals armatz
Ab vassals valens e prezatz,
Auran oimais loc e sazon;
E mand al Don de Corteson,
Sitot s’ es ab Frances juratz,
Contra ‘l cossolat d’ Avignon.
Qu’ el dans d’ aqels del Bautz mi platz;
Q’ ill me fonderon Robion,
Et ancar no m’ en sui vengatz;
Mas domentres qu’ ieu tenc los daz,
Lor en cuich rendre guizerdon.
Coms, si voletz esser presatz,
Siatz adreitz et enseignatz,
Q’ en aissi us tenra hom per bon,
Si als estrains et als privatz
Donatz, e ‘ls enemics baissatz,
E c’ ametz mais dir hoc que non.
Nostre mieitz princes s’ es clamatz
So sabon ben tuich siei baron;
Ar li vai dir tost, Bernardon,
Que non giesca de sos regnatz,
Que trop sovens chai en preison.